انا والحصان

انا والحصان

أقول لك شيه تغلـّبنى
وتتراهن على عنادى
مافيش داعى تعزّبنى
وأنا باقسم معاك زادى

عشان حظىّ أنا اختارتك
وعند عدوّى أجّرتك
وشيلت معاك هموم حيرتك
,وسايق برضه فى عنادى
مافيش داعى تعزبنى
وانا باقسم معاك زادى
,,,,,,,,,,,
مافيش داعى يزيد نوحى ,
وتبقى جروحى تعليقة
ولطموحى بابيع روحى
واجيب لك تبن وعليقة

وأسايس فيك ماتتسايس
وفى الوحلة تروح دايس
بحوفر عمره مايقايس,
أنين صوتى اللى بينادى
مافيش داعى تعزبنى
وانا باقسم معاك زادى
,,,,,,,,,,,,
يامهر حصاوى متعلـٌٌّق
,أنا معلـّق عليك أملى
وزيّك طوقى متعلق ,
وخدتك مهنتى وعملى

أشيل عنـّك واشدّ معاك
وفى الغارزه بأزقّ وراك
وباتحاسب بكلّ غباك,
ولسّه برضه مش راضى
مافيش داعى تعزبنى
وانا باقسم معاك زادى
,,,,,,,,,,,,,
زميلك لبّسوه ميرى,
عايش بيعدّ أيامه
ومدّة خدمته خلصت,
وبيكافئوه باعدامه

ماجرّبتش رصاص غيرى
ياجاحد نعمتى وخيرى
وعاملك صاحبى وكبيرى
,وغايتى وأملى ومرادى
مافيش داعى تعزبنى ,
وانا باقسم معاك زادى
,,,,,,,,,,,,,

ماهش نقصاك بتدّ لـّع,
وقاطع كلمتى ونفسى
وشايف دمىّ بيولـّع,
وباستولاك على نفسى

ياتصبر لمّا تتعدّل
وزهر العمر يتـبدّل
يا امّا الحمل ح يميّل,
ويومنا يبقى مش عادى
مافيش داعى تعزبنى
وانا باقسم معاك زادى
,,,,,,,,,,,,,,
ها نتحاسب تاخد كومك,
تعيش عمرك على شوقك
ساعتها تشقّ فى هدومك,
وكلّ الخيل تدوس فوقك

هاودنى 0و ماتناحيش فيّه
وخلىّ الحابكه مرفيّه
واجيب لك أحلى عربيّة,
وأكربجلك على الفاضى
ومافيش داعى تعزبنى
وانا باقسم معاك زادى
,,,,,,,,,,,,,,

(لـــولا ألفــــلاح)

(لـــولا ألفــــلاح)




ياقلوب ساهيين
عاملين ناسيـين
مش عايزين حدّ يفكركم

هاتوا التحكيم
أبوقلب رحيم
علشان يفصل بينى وبينكم

وانا قلبى حديد
وحاقول وأعيد
والمولى شهيد على نيّـتكم

دانا المدبوح
وف قلبى جروح
ولابدّ أبوح على عمايلكم

لولاألفلاح –
ماكان ألتفاح
ولا كان الخير يملى بيوتكم

فى ايديه الفاس-
لولاها ياناس
ماتلاقوا الدنيا ف دنيتكم

شاف منكو زمان-
أشكال وألوان
وسامحكو وسامح غلطاتكم

وما كانش بخيل –
على ارض النيل
طول عمره بيتعب لراحتكم

طول ليله سهران-
ونهاره عرقان
بشـقاه بيكــمّل فرحــتكم

ياما بات مهموم –
وماضاقش النوم
علـــشان بيوفر لقمـتكم

وقضيتوا عليه-
ماسألكم ليه؟
وداريتوا عنيه عن أفعالكم

عند ألأسعار-
عاملين له حصار
وبأىّ قرار بيســلمكـــم

ولا فى المحصول –
من حقّه يقول
ولا كلمة تكسّر أوامركم

ولا فى التطهير-
ولا فى التطوير
من حقه يراجع فواتيركم

وجنابكو يقول-
يدفع على طول
لو حتىّ ح يشحت على بابكم

تبيعوله مبيد-
ثروتكوا تزيد
وما حدّش يقدر يحاسبكم

مش هوّ زمان
كان الانسان
اللىّ بيتعب على ثروتكم

وخد كلّ ماعاز
م الثورة وفاز
كان عضو مشرّف أمّتكم

مفروض يرتاح-
وحياته براح
وكرامته تزيد عن كرامتكم

مــش بايــــدى

مــش بايــــدى

سعـــدالشرقـــاوى

مش بايدى وغصب عنى
لما تـطلع كلـــــمه منى
شايله همّ الـــــــدنيا عنى
غصب عنى مش بايدى
00000000
مش بايــــدى يقلّ نومى
وسهرى بيستف همومى
ولما اطلع من هـــدومى
رغم انفى مش بايـــــدى
00000000
لو يعادى الـــــنوّم عنيه
لما اضحك م اللـــــــّى بيـّه
او المّ الناس علــــــــيّه
اعــزرونى مش بايـــــدى
000000000
عيـــشه مرّه ودنيا غابه
والبـــــشر زىّ الديـــابه
ومكنه تطحن فى الغلابه
والشايب واقع ف ايـدى
000000000
خـــــد معايا والقى عنىّ
وسيبنى م الاحزان اغنىّ
وفضى نفسك واشتغلنى
مانا عــبدك وانت سيدى
000000000
قـــسّمونى وصــــنفونى
وم العـــلاوى جرّفونى
وتحت فقر البين رمونى
وشمّعـــوا لسانى وايدى
00000000
وسبعه فاتحين لى الشفايف
م البــشر ولا حــدّ شايف
باقضى ليلى ويومى خايف
والجنيه مسخوط ف ايدى
000000000
فيه خلق عايشه مرعـرعه
والـــــدنيا زى المطــبـعه
كل الـــنبات فى المـزرعه
والعفش بس طلع ف ايدى
000000000
حتىّ محصولى الأساسى
قطن رزّ صبحت ناسى
ويّا عطش النيل باقاسى
والحلول ماعدتش بايدى
00000000000
وأىّ وارد للبلاد
جاب معاه كلّ الفساد
والصّحة راحت والعناد
بكلّ عافيه بيلوى ايدى
0000000000
لا فــيه كبار ســالين عــليـّه
ولا حـد حاسس باللى بيـّه
ساعة مايخبط باب علــــيه
تلاقينى ساند قلبى بيــدى
000000000
شبابنا امله فى الجـــــــــواز
وبناتنا عايزين الجــــــهاز
وعشان حيــــطا نا من قزاز
مانحدّفوش بالطوب ياسيدى
0000000000
وفـــــــــيه كتير ناس زيّنه
لوحـــــبوا ياخــــدوا العيـّنه
شايلين اد يـــــــــــهم عنـّنه
وجم مكانها وحطّوا ايـدى
0000000000
قالولى لك تموين وعــــزّ
والاســــره تاكل لــــحم وز
للفرد وجــــبة زيت ورز
ويعدى شهر ماباغسل ايدى
000000000
ومرتـّبك جاله زيـــــــادات
يكفى رسم العـــــــّـدادات
والمنحه ومعاش السادات
لو حتى فــكه مايملو ايدى
000000000
لو حد يتعب م العيـال
اصبر شوّيه ح يبقى عا ل
ماعدش فرصه للسّؤال
غير ع المحطه ومد ايدى
000000000
فيه خلق سكنت فى القبور
وخلق داخــت فى الطابور
اهالينا ماتت فى العـــبور
وغيرنا نهب الخير ياسيدى
000000000
اللى كــــبر زاد وافتره
واللى انفقرعــــضمه انهره
والبــخت سلعه بتنشره
وتمنها عمره ماجه ف ايدى
000000000
والله ياخـوفى يامصرنا
فى الفــــقر يخــــلص عمرنا
وح تبقى عيبه ف وشـّنا
لو عـدّا ابنى وطال حفـــيدى
000000000
لو قلت كل اللـىّ ف ضميرى
وبحت بالاسرار لغــــــيرى
يومها المعامله ح تبقى ميرى
واصبح الاقى الحديد ف ايدى
000000000
وبدل ماتطلـــع شكــوى منىّ
لابد م الاحـــزان اغنـــــــىّ
دايما بقول من صغـــر سنىّ
ياسيدى امرك امرك ياسيدى
000000000
باين علـــــــيها اتعـــــــّـدلت
والكلــــــــمه فــيه اتـــبدلت
كل القــــضايا اتاجـــّــــــلت
واتبرّئت وانا مش بايــــدى
000000000
لو ييجى فكر جــــديد علينه
واصـــــلاحات قدام عنينه
ومسؤلين ياخـــــدوا بايدينا
ح اسبق اديكوا واحط ايدى
0000000000

ميـــن الشيـــخ؟

ميـــن الشيـــخ؟

الواد العربى ابن ام تحيّه
كلّ يومين عامل مناحـــــيّه
وجايب لامّه كـلام وازيّه
وخللاّ حياتها مرار فى الدار
,,,,,,,,,,
فاجآه لقــــينا الواد اتهوّر
وكآن الدين فى زمانه اتطوّر
بعد ما كان فاهم متــــنوّر
وعارف معنى حقوق الجار
,,,,,,,,,,,
كل الناس زعلانه علـــيه
لمّا الدنيا انقلـــــــبت بــــيه
شعر الدقن بقى مغطّــــيه
وشكل عنيه بيـــــــبخّ شرار
,,,,,,,,,,,
دخل على اخته تقول مجنون
وبطح راسها بايد الهـــون
عشان كات فاتحه التلفزيون
وكل الناس ح يروحو النار
,,,,,,,,,,
شاطر بس يربّى حواجبه
وشيخ الجامع قال مش عاجبه
ولا يوم قصّر حد ف واجبه
وفآجآه لقينا العــــــربى انهار
,,,,,,,,,,
خللاّ خواته الرعب ماليهم
وممنوع حد يبصّ علــيهم
ليله نهاره بيضرب فــيهم
عامل سجن ف وســط الدار
,,,,,,,,,
كلّه يقول العربى ايه صابه
ولسّه ياعينى ف عزّ ّشبابه
قصّ هــدومه لحـــدّ ركابه
وشايف كــلّ الناس كـــفّار
,,,,,,,,,
زهّق ابوه وبيحــرق دمّه
وخاصم خاله وعارك عـمّه
بكلّ بجاحه بيشـــــتم امّه
ويهـــبد رجــله ولا الحـــفّار
,,,,,,,,,
لمّا تشوف الشال على راسه
تقول حقـّتنا نشـيلوا مداسه
كاره اهــله وبايـــــع ناسه
وعادل نفـــــسه بــرّه الدار
,,,,,,,,,,
فى كلّ امور الدين يتكـلّم
عمّال يفتى عامل لى معـلّم
وهوّ اساسا مش متعـــلّم
كان فى الورشه صبى نجّار
,,,,,,,,,
شوفوا العربى ناويلنا على ايه
لمّا الشــبهه بانت حواليه
لمّ الشـلّه الصايعه عليه
وعملوا جماعه وصبحوا كتار
,,,,,,,,,,
سرقوا ونهبوا وخطفوا وضربوا
ومن اصناف المنكر شربوا
واخدوا فــــلوس الخلق وهربوا
وبقت هيصه ولعب صغار
,,,,,,,,,,,
حريمهم غـمّوا معاهم رزقه
وعند زعيمهم اخدت فرقه
طالعه الاولى ف فنّ السرقه
ومتخـبّـــيّه بالف خـــــمار
,,,,,,,,,,
أنا خوفى لايبوّظ أخوه
وباقيت الخلق يطاوعوه
والأزهر نايم صحّوه
يحمينا لآخر المشوار
,,,,,,,,,,,
وم الفتنه لا تكبر فى بلدنا
والسّوسه ها تنحت فى ولادنا
ولا حاجه ح تقدر تسعدنا
غير شرع نبينا المختار
,,,,,,,,,,,,
والدنيا ح تتمرجح بينا
وعند الحق تخبّى عنينا
انت لوحدك عالم بينا
حوش عنـّا ياربّ ياستـّار
,,,,,,,,,,
مين الصحّ ماعنـتش عارف
وانا بعنــيّه الاتنــــين شايف
من كلّ دقون العالم خايف
وعقلى خلاص ياخونّا احتار
,,,,,,,,,,
عايز اعرف مين الشـــيخ
قبل ما عجّز واللاّ اشــــيخ
يا امّا افارق كــــفر الشيخ
والمّ هدومى وســـيب الدار
,,,,,,,,,,

حبّـــة الفـــــول

حبّـــة الفـــــول

أحسنتى فى القول يانبتة فول فى سجودك
وعرفتى فى الطين بتحنى لمين عنقودك
والأرض حنـّت وكنـّت فى الدفا لحضنك
ولف غصنك حصى شاهد على وجودك
,,,,,,,,,
فلقاكى ايد العنايه بالقدر نصّين
والروح مشت فى النـّوايه وعلـّمت صفـّين
بدات حياتك بحب الأرض والعشرة
وانفكـّت القشرة وظهر جوّه الغلاف فصّين
,,,,,,,,,,
رافعين ورقهم بنيّه للخشوع والفرض
مكتوب عليها الأجل والعمق ويّا العرض
والطـّرح ساعة معاده وامتى هاينوّر
وجدور تدوّر على النعمة فى بطن الأرض
,,,,,,,,,,,
بالحكمة سارى ف معدتك ويضخّ فى الشرايين
عارف طريق سكـّتك شادد غذاه م الطين
سارح وسابح فى حبّ الأرض ووجوده
فاتح لعوده مجال عايش مابين شطـّين
,,,,,,,,,
وفى النهايه يافول مأكول بنى الأنسان
لاحبست يوم خطوتك ولا مرّه كنت جبان
واللىّ عرف قصّتك حاير مابين أمره
ويقضـّى عمره ف خجل من نعمة الرحمن
,,,,,,,,,

ياخــرابــى بعــدك ياعرابــــى

ياخــرابــى بعــدك ياعرابــــى


ازرع وانتج وما تسألشى

لمّا يطيب ح تسوّق فين؟

علشان صوتك ما بيوصلشى

قول لى ياواعى هاتشكى لمين؟
,,,
كلّ المهن التانيه تنادى

تلقى بلادى تنادى معاها

والاضراب بيبان مفعوله

علشان واقف حدّ وراها
,,,
غيرك فايت عيشه البايت

حىّ بيرزق من حواليك

وانت يابعزق عمّال تعزق

والأسعار تتحكـّم فيك
,,,
وكـّل وزّك انتاج رزّك

وقصقص ريشه أحسن ح يطير

بكره البيض يتربّا ف عزّك

على ما نشوف لك باب تصدير

,,,
احنا نجحنا بعد كفاحنا

فى حرب القطن قضينا عليه

وبكره نبطـّل نزرع رز

وحزّر فزّر ناكل ايه
,,,
ودا ارشاد مدروس ياعنانى

لمّا سلومه منع الغلـّه

وزرع لب كتير وسودانى

وكل الناس قعدة تتسلـّه
,,,
اوعى يابعزق تزعل منىّ

وسلـّملى على كلّ اصحابنا

وانت معاهم ح تنوب عنىّ

وان شحتوا ما يجوش على بابنا
,,,
ياحلاوه والدنيا طراوه

والزرع بيطرح أفراح

ياخرابى بعدك ياعرابى

ومحلاها عيشة الفلاح
,,,

اليتيم

اليتيم

بالقســـوه لــيه بتعـامــــلونى
واما افتكــــركم تنســونـــى
كــتر البكى دوبنى خـــلاص
والدمــعه جــفة فى عـيونى
=======
مين بعـــد ابويا يراعــينـــى
وف حضــن حبــه يـد فينى
فـى الحر ضلــه يرطـبنــــى
وف البرد عــطفـه يغطينى
=======
ليـــــــه الزمــن يغــد ر بيــه
وقلوب الناس تأســى عليــه
مـن غير ســبب ليه كرهونى
والغـلطــه محسوبـه عليـــه
=======
ليـه كل واحـــد قا ل ابنـــــى
وع المــعــــــد يه يســبنـى
وان قــلت له خدنــى ياعمـى
من غيظه يرجع يضربنـى
=======
قــولوله مــره ياخـلـق الـلــه
يبقى ساعتها ياخدنى معاه
يكــــــفينـــى فضــــلة اولاده
وثوابه ح يكــون عند اللـه
=======
الكـــــل منـــــى بيتــــألّــم
ويمــشـــى من قبل ماسلـم
يقــبل هزار غيرى وغــلطه
ويشــتمنى من غير ماتكلم
=======
الصــبر طـــوّلهـــا عـليــــه
والد نيـا ضلمـه فى عــنيـه
والخــلــــق منـــى بتتـهـرب
وما بتـنـشـحـتـش الحـنيـــه
=======
هـاتــى يادنيا كــتير هاتــى
وزوّدى ف لـيلــى اهـا تــى
مهـما الزمــن يغــدر بيــــا
صابـر عـليــه انا واخـواتـى
=======
لاخـال بيسـأ ل ولا عـمــى
ولاحـد يــوم بيــشيــل همى
مـن يوم ماودعـــنا ابويــــا
والحـمل زايد عــلــى امــى
=======
ليــه يازمن منـتش حـسّاس
تهـمـت امــى با ى اســا س
ويـوم ماتجرى على ولادها
ما تكـتفـيش بكــلام النــا س
=======
معانا الزمان صفىّ حسـابه
كل اللى نا وى عـليه جـابـه
ولــما سلـّـمــنا له روحـــنا
بيعــضــنــا ليــه بنيـــا بـــه
=======
الخــلــق فتحـا لنا عـنيهـــا
وكـــا ننـــا مـن اعـاديــهـا
وفــكــّـرت انهــــا دايمــــه
والكــا س مــاح يلف عليها
=======
يــادنيـــا ليــــه بتحاربيـــنه
وعن كل شــيء بتحاسـبينه
فى الـراحه دايما والجـــايه
بــكل قـســـوة تســـبينــــه
=======
بــقـــول يـــا رب تقـدّ رنه
وتبعـد شرورهم عن دارنه
وتصــرف ازاهـم نواحـينا
واحـنــا بــس تصـــبرنــــا
=======
ماحـــد غـيرك يراعــينــه
يـا رب ويحـــن عـــلــينــه
محــتاج لعـطفـك وحـنانك
مافــيش غــيرك عالم بينـه
=======

(فين الضمير ياناس)

فين الضمير ياناس)تضامنا مع بنت الاسكندرية

ذكرت جريدة الجمهورية المصرية انه فى احدى مدارس الاسكندرية
اساء مدير المدرسة بالعملية التعليميه حيث امراحدى المدرسات
بتدوين اعتزار كتابى الى ولى أمر تلميذة عنفتها المدرسة حيث انها ابنة
دبلوماسى عربى ولديه القدرة على معاقبة المدرسة باكملهاوظل المدير يهدد المدرسة
بان ولى الامر سيحضرها عنفا من منزلها ويفقدها كل غال وثمين
فى عزريتها وبنفس التحذير لاولياء الامور الذين حضروا يشفعون لها
وقام بجمع هيئة المدرسة مدرسين وطلاب ومن خلال الميكرفون وفى بكاء
قرأت الاعتزار وولى امر التلميذة يسجل المهزلة بالموبايل وما انتهت من
الاعتزار حتى تقدمت باستقالتها الى ان تدخل السيد وزير التعليم بقرار
عودتها الى العمل وتضامنا مع فضيتها دعونا نتساأل
(فين الضمير ياناس)

00000
اوعك تخافى الألم
اوعك تطاطى الرّاس
دا العلم رمزه القلم
والكلمة والكرّاس
,,,,,
روحى فى حضن العلم
حاتلاقى جنبه أساس
وبصرخه تحيى العدم
تطلع بكلّ حماس
وتنادى كلّ الأمم
فين الضمير ياناس
,,,,,
اوعك ياساره الخوف
يحبس فى يوم خطوتك
ولا تحت أىّ ظروف
تـتدّارا يوم شكوتك
وتعاملى ع المكشوف
علشان تبان همّتك
باكيه فى وسط ألوف
مابيساووش دمعتك
والجبن كان مكسوف
لمّا سمع كلمتك
قولى لمصر الكرم
أمّ القلوب الماس
ونادى كلّ الأمم
فين الضمير ياناس
,,,,,
الندل لمّا يبان
تلاقيه فى جبنه هرب
ولا يخشى أىّ هوان
ومزلـّه لو ينضرب
فى الوشّ له عنوان
مكتوب بلون الجرب
وأبوكى كان انسان
مع اللىّ بيته انحرب
حارس على الأوطان
شايل هموم العرب
نادى وحيّى العلم
واوعى العلم ينداس
نادى فى كلّ الأمم
فين الضمير ياناس
,,,,,
لا الجانى كان أخوكى
ولاقاضى ابن العمّ
ولا اللىّ شافوكى
ولا حدّ بيكى اهتمّ
وقفوا يتابعوكى
والنظرة زىّ السمّ
علشان يزفـّوكى
وفى الوشّ أزمة دمّ
الجانى كات أمّه
تاهت مع الغمّه
نادى وحيّى العلم
واوعى العلم ينداس
والنيل ينادى الهرم
يصرخ يصحّى الناس
,,,
اوعك تخافى الألم
اوعك تطاطى الرّاس
دا العلم رمزه القلم
والكلمة والكرّاس
,,,,,

شم النسيم

شم النسيم

شم النسيم لما جه شوفت العـجب فى الناس
الشمس نورها وصل شربوا البصل بالكاس
حتى الفسيخ اتنـــفخ خــــللا النفوس عامت
والعركه قامت مابين مصران وبنــكرياس
00000
البيـــــضه وصلت دولار لو يعنى فسـدانه
ولمون عصــــيره مرار والنفس حمضانه
والحـــــــرب داير مابين الرنجه والامعاء
والمعده اصلا فى عــــيد الفطر تعــــبانه
00000
ولكل واحد مكان مخــصوص ح ياكل فيه
وحماته ساءله المدام ايه اللى نفــــسك فيه
هاتى الصحاب والكـــلاب والقــطه ويانه
واتغدى ويا العيال واللى يفـــــيض ارميه
00000
شوفولنا توكتوك عــشان ينقلنا أو حنطور
ويجيبنا آخر النهار يعرضــــنا ع الدكتور
احسن عليهم زحام والحجز ع الاســـبوع
وعيالنا ممكن تموت على بال ماييجى الدور
00000
حتى حمـــــيده اللى كات حالته على قدّه
وعياله دســــته ودين سبحان من ســــدّه
سمع مراته صــــــدر منها يمـــين بطـّال
بسرعه لمّ العـــيال وسنـّار الغـــرام شدّه
00000
هات كل حاجه شـكك يعنى لآخر الشهر
عايزين نشمّوا النسيم كفيانه كسرة ضهر
ساعة ماتفرج قــوام ح نلفـّوا ونســــدّدوا
وان عيشنا نستوردوا حتى النكد والقهر
00000
احســن مكان ح يتاويك وانت ولـد لامع
تعــجبنى مدّة اديك على عـتـبة الجـــامع
قضيت حياتك مع مراتك وشورها عليك
والفقر ينده عـليك وعامل لى مش سامع
00000
يابو العيال شمهم وبلاش نســــــيم ينشم
نظرك لفــــوق يلوحك ولا حد بيك يهتم
خللى المدام تسـندك فى خلاصة الموّال
وعيش وربى العـــيال وخللى عندك دم

أسف يامه

اسف يامه
اشعار/سعد الشرقاوى
الى ام التوته الفلاحة التى ماتت لاتعرف القراءة والكتابة
حيث طبيعة المكان والزمان

الى امىّ

اسف يامّه ماكانش بخاطري
لماكــــنت باجـــيلـك اجــــــرى
اقول لك راجـعى معايادروسى
وانا فى دماغـــى ان انتى بتقرى
=========
يفضــــل قدرك عــندى عــظيم
لمـــا اقـــابــــــل رب كـــــريـم
واهو مـــش ذنبـــك انتى براءه
ماكانـــش زمانـــكـــم فيه تعلـيم
=========
قال بـيقــولـــوا ياست النــــاس
اهى كات جاهله ماتت وخلاص
وانا ماقريتــش كتاب من بعـدك
بيـــوضــح معــنـى الاخـــلاص
=========
فاكرلمــــا عرضــت علــــيكى
كـتابتــى وقولتى جمـــيل الخط
ورغم مشـــاغلك فرحـــتينـــى
ورحتى ساعــتها تعشــــى البط
=========
يعنى الجاهله تشـــــع ايمـــان
وتكـــون نهر لخــــير وحــــنان
تصـــحى الفجر تمللى تصلى
وضناهــا تحــــــفظـــه قـــــران
=========
مش انتى الجاهله ياغاليه عليه
ياللــــى علـــومـــك جوه عــنيه
وف مدرســــتك وف كراستك
عـــلم العــــالـــم مــن حـــوالــيا
=========
والله الد نيــا انقــلــبت بينــــــا
ويــاما قســـينا ياغاليــه ف بعدك
وسموا عيـــالك طــنط ونيـــنه
وحتى اخــلاقنا ضاعت من بعدك
=========
تصدقـــى يامـــه ان الايام دى
الـــكل عامـــل فيهـــا افنـــــــدى
والجــــاهل لمــــا بيــــتفلسف
من خيـــبته علــى اصلــه بيردى
=========
واللـــــى يروح منهـــم كليــة
يتــكلـــم بلـــــغات عــــصريـــة
واحــــــيانا يتـــبرامـن اهــله
لمـــــا بيــــاكلـــواعلـى الطبــليه
=========
يعـــرف واحــــده يكلم ابوها
من غيرما اهله ييجوا يعـأيــنوها
ولما نســايبـه يوجولاه البيت
يدارى امــه احســن يشوفــوهـــا
=========
بينــســى فــــضل الام علــيه
وعــامـل وســط العـالـــم بيـــــــه
قال مش عاجبه البيه بسلامته
وهـو بحــالــه مــا يســوى جــنيه
=========
لمــــا بشـــوف ثقافتنا ياحبى
فى طـــبع يخا لف ديــنى وربــى
تـــبقى جهـــا لتك لما سالتك
هــيا النـــــور لعــــنيا وقـــــــلبى
=========
صــابريامه وصبرى كاوينى
وفكـــرك يمـــسح دمـــعـة عينـى
ومين فى الفرح حايسعدقلبى
وف احزانى مين يواســـــينى
=========
موت الغالـــيه هد كيـــانــى
بقيت فى الدنيا خلاص وحــدانى
لولا دعاها اللى ف صلواها
كـــنت دخــلت ف عا لــم تانــى
=========
نهـــر عطاها تمــللى يزيــد
مهــما تكـــون عن عينــى بعـيــد
واحتفـالاتى ف كـل حياتــى
طــول ما نا فاكـرك اجـمل عـــيد
==========

بحبّك يامصر

بحبّك يامصر
,,,,,,,,,,,,
آه لو بايدى ياستّ البلاد
واقدرأليّن قلوب الولاد
نراجع تاريخك فى يوم الميلاد
ونرفع رايات الكرامة يامصر
,,,,,
آه لو بايدى واضمّك لحضنى
وابوح لك بحبّى وحنانك ياخدنى
واحسّ انّى ابنك وعطفك ساندنى
وترخص حياتى عشانك يامصر
,,,,,
وأشوفك اصاله وضلّ وامان
وريحة جناين ونخل وغيطان
وألفّ السواقى وأروّى الشراقى
وليكى اشتياقى بيكبر يامصر
,,,,,,
ابنك وكان البعاد غصب عنىّ
وراجع وعارف لطيرك تحنىّ
تقولى ضنايا اللى كان حتـّه منىّ
وأزيّن خدودى بترابك يامصر
,,,,,,
وحنان الامومه يبان ترضى عنىّ
وتحت جناحاتك تسيل دمعة منىّ
ساعتها ح يظهر دليلك لأنىّ
بحبّك بحبك بحبك يامصر
,,,,,,
واخضّر فى سيوه واعمّر فى سينا
فى وسط الصحارى تبان كام مدينه
وأعمل شطوطك مراسى ومينا
واقابل ضيوفك بحضنى يامصر
,,,,,
شعارى ف يوم التحدّى الصمود
واوقـّف عنيّه حرس ع الحدود
زخيرتك فى دمّى ونفسى بارود
وأفدى ترابك بروحى يامصر
,,,,,,
وأشوفك عروسة فى يوم الزفاف
وأحسّك طهاره واصل وعفاف
وبين الحبايب يموت الخلاف
ونزرع جدورك محبّه يامصر
,,,,,,
ياحضن المقطـّم ياكبرى اللمون
ياريش الحمامه ياغصن الزاتون
ترابك مكاحل لمجرى العيون
ونيلك مسجّل تاريخك يامصر
,,,,,
كلامى وسكوتى ياغاليه بحبك
حياتى وموتى مدوّبنى حبك
واكرّر بصوتى اللى مبحوح بحبّك
واحبك احبك احبك يامصر

فلاح من زمن راح

فلاح من زمن راح

كنت باخبّط زلطه ف زلطه
أولـّع ألف شـــرارة نار
كنت ببصله وقرنين شـــطـّه
بأوكـّـل كلّ جــيران الـّدار
,,,,,,
كانت هدمه بفرد قــــــطان
وحدوه وحتّة شال وقميص
ووش صـــديرى من الكتان
يكفـّوا لزفــّة ألف عــريــس
,,,,,,
كانت الشله على مصطبتى
تفــكــّر قــبل وابور الغاز
انها تعـــمل حاجه جـــديده
تنوّر اسمها لمـــــبة جـــاز
,,,,,,,
كانت العرصه ولفلوف قشّ
اشوف دخانهم بيشـــبّعنى
كـــــنت اشاوش عمى أمين
كل العزبه كانت تسمعنى
,,,,,,,
كنت باكرّك واحرت وازرع
وأرجع الف النورج تانى
رسمة شق الارض ف رجلى
ولا يوم ايدى تبات وجعانى
,,,,,,,,
كنت بافـكــّر أعمل حاجه
مابتحصـــلش لكلّ الناس
أطوّر ساقـــية عمّى وخالى
تكون همّـالى ماهش كبّـاس
,,,,,,,
كنت اتمنى أســــدّد دينى
وانسى همومى شويّه وافوق
ومن مجاميعه أجهّـز بنتى
بطــقم عزال يملى الصندوق
,,,,,,,,
كنت باخاف الفجر يشقــشق
وانا متغطىّ ف وسط عيالى
كنت باخاف لا الارض تشقق
وانا نعسان ع اللـّحف ليالى
,,,,,,,,
كنت باروح السوق مع جمعه
وبعدها جمعه ماشوفش عيالى
كنت باشق ف يوم على عمى
واقضّى يومين فى زيارة خالى
,,,,,,,,
كلمه يقولها صغــــــير عنىّ
تبقى هفيـّه ولعب صغار
كانت الشخــــطه بتطلع منىّ
توقــّع فــوقهم سقف الدار
,,,,,,,,
كنت أبيع خلــخال الحاجّه
واشترى نعجة وكبش كبير
واللى يفيض من تمنه يكفىّ
غطفه ولاسه وكركه حرير
,,,,,,,,
كانت العــين بتبصّ عليّه
وحالتي ف وسط العالم زايده
وانا راس مالى ودخل عيالى
نعجه ونصّ حمار بالفايده
,,,,,,,,
كانت الحاكـيه وشاي الرّاكيه
ومنجل حامى تمللى ف ايدى
أنام وغطايا شوال ع الساقيه
وعمرى ماقلت لندل ياسيدى
,,,,,,,,,
كنت بأجّـل فرح العــــــّـيل
شهر وخمسة وتسـعة كمان
علشان جارى قريبه بعافيه
وشاف له منام كان فيه تعبان
,,,,,,,,,
كان فى العزبه راجل متنوّر
كل الناس عايشين على حسّه
وف رمضان يخبرنا بصومه
بعـد الشــــــهر مافرقع نصّه
,,,,,,,,,
كـــنت باْ روّح نافى معايا
يسند عندى جدار وسطانى
وأرفع باب الدار على كتفى
أفرّد شدىّ وارجــّـعه تانى
,,,,,,,,,
اىّ صغـــــيّر عنىّ مايقدر
يوم قدّامى يلفّ ســــجاره
واللا ف يوم يعوج كلبوشه
واللايعـدّى راكبلى حماره
,,,,,,,,,
كنت أزامل أخويا وجارى
وأنفار يامه نفوسهم صافيه
نجدل بوصى ونعرش دارى
ونليّــسها بعرق العافــــيه
,,,,,,,,,
ونعتب ع اللى ماجاش يساعدنا
وياخد ايدنا عشان نبنيها
واللى يجينا عشان يســــــــعدنا
يرسم سـبع ونخله عليها
,,,,,,,,,
كنا نعالـــــــج كل عـــــيالنا
فى دور الحصبه وهمّا صغار
بنلبـــــــــّسهم أحمر فاتـــح
وبنحـــــبسهم يوم فـــــى الدار
,,,,,,,,,
واللىّ يطوّل مرضه شويه
أحسن فكره عــشان نداويه
أمـّه تحـــطّه ف جردل ميّه
يا نشوف ستـّه عشان ترقيه
,,,,,,,,,
ماهى كات ست كبيره وعاقله
وهــيّا ياناس نــــّوارة الدار
تخــــــرم ودن البنت بابره
شالتها ف شق فى قلب جدار
,,,,,,,,,
كانت الفجر بتصحى تصلّى
وف حلتها تخــضّ السّمنه
واتتـــّوه فــــــينا لو تنادينا
ولا الابنودى وعمته يامنه
,,,,,,,,,
ربعة كيل فيها طاست الطـّربه
معاهم لفة تـــيل ومسلّه
تحكّ الزّلــطه ف قلب محاره
وتعمل قطره لعفر الغلّه
,,,,,,,,,,
لماّ نعوز نحاربها بنضحك
كان بيــــــبان من لوية بوزها
علــشان سابع سنه متوفى
وغالى عليها المرحوم جوزها
,,,,,,,,,
كات عملالى الرفّ العالى
فـــــيه السّبحه ووشّ صــــديرى
وكلّ أوراقى الخاصّه شايلها
ف ظرف جواب ف شرابى الميرى
,,,,,,,,,
لو كان خيرنا ف يوم حصّـلكوا
وخللا الدنيا مشت ويّاكم
اوعوا لاتنسوا الزمن الماضى
وافتكـــرونا ولو بدعاكم

حكايات(تحت التوته) رقم (13) عمىّ خليل

حكايات(تحت التوته) رقم (13)
عمىّ خليل

مرّه ضــــــــــــلّ التوته ميّل
جاب معاه نسمة عصــــارى
كان (خليل) قاعد مقيّل
مش غريب ماهو برضه جارى
,,,,,
كان (خليل) ايّام شـــبابه
يحب وســط الغيط يغنىّ
جت فى بالى لمّا جــانى
وشوفته قاعد جنب منىّ
,,,,,
قلت له سمّعنى صــــوتك
واحكى حال الفـــــلاحين
عشان تاريخهم كلهّ عندك
مانتا عايش من سنـــــين
,,,,,,
قال لى لو كان ع النـــــهار ده
مش ح اقول اصل انت عارف
كلّ جيلك فى حكايــــــــــاتهم
اللــــى سامـــع واللىّ شايف
,,,,,,
وبص ليّه بعـــــــين جريئه
وراح مقصّر فى الكــــــلام
وقال حاجيب لك من عرابى
لحدّ مؤ تمر الســـــــــــلام
,,,,,,
واللىّ فاضل من كلامى
حد غيرى ح يقـــولولك
لو ح تسآل أىّ شاعر
كلهّم ح يكـــــــــمّلولك
,,,,,,
قلت غنىّ بصوتك انت
واحكى ع الدنيا الغريبه
واللىّ سامعينك حبايبك
كلهم من أهل طيبة
,,,,,,
قال من زمان عايز أغنىّ
للسواقى فى الغــــــيطان
غنوه فيها الشوق وفيها
نبـــض قلبى من زمان
,,,,,,
السواقى ف غيطنا كانت
صوتها صوت الفلاحين
صوره ناطقه عن حياتنا
لمّا كــــنّا شقـــــــيانــين
,,,,,
كنت باسمع صوتها وابكى
العليل يشـــــــــــكى لعليل
كان انينها بيحكى وضعى
وضــع كان مؤسف ذليل
,,,,,
والجاموسه تدور وعينها
زى عينى معــــصوبين
والقدم عـــريان وحافى
فيه شقـــوق مليانه طين
,,,,,
كنت اقوم من نومى واصحى
والفـــــــطار مش وسريس
والغدا رغيف عيش وبصله
كنت بين النــاس رخــيص
,,,,,
مرّه فاكر لمّا جــونى
ناس قالولى كلمتــين
لانتخاب البيه بتاعهم
والجنيه اخضر وزين
,,,,,
الجنيه كان حلـــــم عمرى
قلـــــــــــــت اهلا بالجنيه
وانشحنت ف لورى يومها
غصب عنىّ واعمل أيـــه
,,,,,
جارى كان فلسوف شويّه
مانتخـــــبش البيه يوميها
شخبطوله ف ضهره كلمه
خد له علقه كبيره فـــــيها
,,,,,
حتـــى هوّا برضه صمّم
واحنا نضحك من غباوته
كنّا قال فاكـــــرينه اهبل
كان بيضحك رغم حالته
,,,,,
قال يوميها البيه قصدنا
خطبه حلوه فى الصيوان
راح يجيب الديب وديله
راح يعيّــــشنا ف امان
,,,,,
بيته كان مفتوح لآ خره
فاتحه دايما للضـــيوف
لمّا خد اصواتنا روحنا
قلنا لمّا نروح نشـــوف
,,,,,
مالقيناش البيه فى بيته
مالقيناش غير الغفـــير
قال بان البيه مسافــــر
والسفر ح يكون طويل
,,,,,
والكلام الحـــــــــلو كلـّه
راح واصبح مستــحيل
واحنا احــــنا زى ماحنا
فى الطريق من غير دليل
,,,,,
أجرى وألعب فى العصارى
ويّا شلـّه من الصّحاب
فى حتّـّه واسعه جنب دارى
نفـّـيخة حطينها فى شراب
,,,,,,,
والناس تلومنى لو ف مرّة
تخبط فى حيطه أو فى باب
حتىّ طعم العيشة مرّه
ماعندناش مركز شباب
,,,,,,
روحت جنب الساقيه اغنّى
مالتقيــتش حدايا صــــوت
صوتى حشرج جوّه زورى
كل شئ فـــــى عنيّه موت
,,,,,
رحت ماسك نايى كاسره
اعمل ايه بالناى صحيــح
مش لاقــيلى نفــس اغنّى
قلبى كان محزون جريح
,,,,,
كان منايا وكــــلّ املى
انّى اشوف لى يوم سعيد
يوم اكون صاحب سياده
واكسّر القــــيد الحـــديد
,,,,,
قلت شئ لله ياســـــــــيدى
ندر منىّ لكل شـــــــــــيخ
لو حقوقى الضايعه رجعت
قبل ماكبر واللا اشــــــيخ
,,,,,
واستجاب اللــــــه دعايا
لمّا شوفت ف يوم جمال
قال لى قوم ارفع دماغك
راح خلاص عهد الضلال
,,,,,
يالله ازرع فى ارض ملكك
كل خـــــيرها يعود عليك
انت تزرع وانت تحــصد
ماتلاقـــيش ويّاك شـريك
,,,,,
والمدارس لابنى فاتحه
يستفـــيد منها الدروس
والتقيت مستشفى هايله
بتعالجنى بدون فلـوس
,,,,,
والمحال اصبح حقيقه
وعمّ نــــور الانتصار
والعــبور نوّر حياتنا
وخللا ايامنا عــــمار
,,,,,
والســـــلام رفرف جناحه
ع السواقى فىالغـــــيطان
والحق راجع بيت صحابه
بعد صبر وشـــوق زمان
,,,,,
روحت قاطع بوصه حلوه
ورحت عامل منها نـــاى
والآهات صارت غناوى
والغـــيطان غنّت معاى
,,,,,
والسـواقى كات بترقص
صوتها صوت الفلاحين
فلاحين النصر عاشــوا
فوق غيطانهم فرحانين
,,,,,
يالله هات الباقى منــهم
واكفياك وارحم خليل
فلاحين اليوم بحالهم
صبحهم بقى أحلى ليل
,,,,,
والتقينا خليل مشوّح
من هنا قــــطع الكلام
وافتــكرت انّ اتفاقــنا
لحدّ مؤتمر الســـــلام
,,,,,
وهنا توقف خليل عن الكلام وتذكرت انه
طلب الحصول على باقى حياة الفلاح من اهل طيبة
فيااهل الخير (حسنه قليله تمنع بلاوى كتيره)هل اجد من
يكمّل مابداه عمّى خليل وله الاجر والثواب عندالله000

حكايات تحت التوته (عمّى اسماعين)

مرّه تحت التوته قاعد
لمّا فاض بيّا الحنـــــــين
نفسى حدّ يقول لى حاجه
كات بتحصل من سنــين
,,,
حسّيت بخطوة حدّ جانى
جـــــه ينادى قــلت مين؟
وروحت فارد طولى واقف
قـــلت اهلا ياسماعــــين
,,,
كلمه منىّ وكلـــــمه منـّـه
قال لى قوم وكــّـلنى توت
قلت حـــاضر من عـنــيّه
قعـــدتك وحــشانى موت
,,,
يالله قول لى ع الحـــكايه
لمّا جيت من مصر ماشى
يوم ما بعت القطن كلــّـه
وقلت اتاجر فى المواشى
,,,
قال تعالى اقعد فى ريحى
وخللىّ توتك مش ح ضوقه
يومها كات المعده جامده
وباكل الفجل بعـــــروقه
,,,
كنت قاعـــد مرّه يابنى
والعيال قعــــدين معايا
خدتهم كده بالســــياسه
وقلت فيه مشوار ورايه
,,,
بعد جمع القطن ناوى
انىّ ازور سيدنا الحسين
له حـــــدايا ندر بايت
يومها كان الندر دين
,,,
اخدت ست البيت معايا
برضه نادره وجت تزور
من بلــــــدنا قمنا بدرى
وروحنا راكبين البابور
,,,
البابور عــــــــــمّال يزمـّـر
واحنا طبعا فى انبـــــــساط
ع المحطـّـه ف مصر شوفنا
خلق ولا ســــــوق التلات
,,,
عينى اوّل شـئ تـشــوفه
ع المحطــّه شئ كسوف
الحــــريم اجسامها باينه
والشــباب عمّال يشوف
,,,
عزيزه بصّـتلى و قالت لى
احنا فـــين قول ياسماعين
انت جاى تدخل فى سيمه
واللاّ ح تزور الحـــسين؟
,,,
شوف رجالهم ياسماعــــين
وخدين حريمهم تحت باطهم
حتــّى مش متعــــــــفـّرين
ماعندهمش دراس فى غيطهم
,,,
ياختى واحده كبيره شايبه
شايله كلب يادى الكسوف
ياسماعــين استر عـيونك
ع البشر اوعاك تشوف؟
,,,
من غيرمؤاخزه البنت ماشيه
مع الولد ماسكين اديـــــهم
لوحد جارهم صدفه شافهم
يقول ياعيب الشــّوم عليهم
,,,
اللى داهنه الوش بوهيه
واللى توبها ماكفهّاش
واللا يمكن غصب عنها
الترزى خد بقيت القماش
,,,
الناس فى مصر بيجروا خالص
ع القدم من غير حمـــير
ولا فيه كبير يعزم علينا
بالغدا ولا بالعصـــــير؟
,,,
الحريم دى اشمعنه ماشيه
قالعه توب الحـــشمه ليه؟
فين راجلهم فـــين ابوهم
عيب وليه ساكتين عليه؟
,,,
قلت مالك بس بيــــــــهم
كلّ واحد عـقله فـــــــــيه
دول حريم مالهمش رابط
واحنا مالنا ونعــــمل ايه؟
,,,
امانه يــــاهل البـــــيت امانه
صونوا مصر فى الموضات
ياحســـــــــــين ياست زينب
دانتوا ليكم معجــــــــــزات
,,,
رحنا نركب واصله تانيه
نحتوا فيها الارض نحت
قالت هيالى مصر فوقنا
واللاّ هـيّا الدنيا تحـــت
,,,
ياسماعين ماتعلــّى صوتك
زحمه يامه ونفسى اسمع
عايزه اطلع فى الطراوه
ياسماعين روحى ح تطلع
,,,
اصل فيه كام قطر واقف
والبشر ملموم علــــــيهم
هوّ دا السّـلــّم ياسمــــعه
اللىّ منــّـه نزّ لــــــوهم
,,,
هوّ كان فيه حدّ قل لى
انّ تحت الارض قــطر
واللاّ بافــهم فى الكتابه
واللا باعرف اقرا سطر
,,,
كنت محــروج من مراتى
وعمرى ما حفرّط فى هبتى
وخــفت اسال حدّ حاجــــه
يكـتــشف جـهلى وخــبتى
,,,
قلت لو فى العمر يوم
لازم افهم فى الكتابه
وعرفت ان العلم نور
وهوّ دا سلاح الغلابه
,,,
فزّى قومى يالـلـــه نطلع
م المحطهّ القــــــطر فات
فيه ولد حسّـــــــيت بايد ه
فى الزحام لطش الحجات
,,,
قلت لازم اجرى اجـــيبه
التقـــيتها ماسكه أيــــدى
والبشر ملــموم عـلـــــينا
تقول سايبنى لمين ياسيدى
,,,
واللىّ فـيــهم قـلـــبه طيّب
يجرى ويســكـّت عــزيزه
واللىّ عنده فلوس فى جيبه
يمدّ أيــــده يجـــيب بريزه
,,,
قـلت مش عايـــز فـلوس
بدّى ناس ف قلوبها تقوه
يوصّـلونى انا وعــزيزه
لحــدّ تــوتة الــــشراقوه
,,,
بسرعه اهل الخــير خدونا
وركــــّبونا ع البابــــــــور
مارضيناش فى مصر نقعد
دمّى كــــــان عـــمّال يـفور
,,,
دا ف بلـدنا العـــفـّه غاليه
وفيها تعــــــدل كلّ مايله
والمديـــنه سيفها ماضى
عايزه فاضى وايده طايله
,,,
اخدت درس العمر يابنى
ورحت نادم ع الليّ فات
من يوميها الجهل سابنى
وابتـــد يت اعرف لغات
,,,
والى لقاء...
تحت التوته

منتخب المصريين

منتخب المصريين

دول فلاحين منّنا شاربين سوى م النيل
عاشقين تراب البلد والساقية والمواويل
العهد بينهم صدر على النضال والجلد
يخللوا صوت البلد بيغــنىّ طول اللـّيل

كشف (شحاته) انـّه رامى الحمل على مولاه
قال مصرى دى أمنا واحنا معانا الـلــــــه
علشان يفجّر لهيب الكرب فى ســــــــكوته
بعلو صــــــــــوته(حبيبى يارسول اللــــه)

لو جبت سيرتك ألاقى الكلمة تحلا لى
(حضرى)ياروح قلبنا ومقامك العالى
زرعت فينا الأمل خلـّيت حياتنا أمان
ومنعت سيل الطوفان ياســدّنا العالى

(وائل ياجمـــــعه) باشوفك فى الدفاع بارتاح
(هانى) و(فتحى) مع (معوّض) فى دنيا براح
(الســــقا) و(محمدى)على غرفة التنســــــيق
(فتح الله )مع (توفــــيق) بينظموا الأفــــراح

طول عمر( متعب) بيتعب فى الدفاع ضــــدّه
لو كورة جات له من( احمد عـــــيد )على هدّه
توصل فى وسط الزحام (للشافى )واللا( زيدان)
تدخل فى حضــــــــن الحنان لو مسّها (جدّو)

(شيكابالا) يا(معتصم )يا صرحنا العالى
(شوقى غريب) علمك ع اللعب فى العالى
خللاك سحرت القلوب م الفن والافراح
بتعالجوا كل الجراح انت و(حسام غالى)

(احمد رؤوف) يابطل (حمدى) ياوش الخير
يا(عبدربه) ياساحر عقلنا ياكبــــــــــــير
تحية خاصة( لحسن )ومعاه (سمير زاهر)
وكل ماهر وفنى من طبيب لخبـــــــير

ياحبيبنا يا(احمدحسن)يا مصنـّع الأهداف
حرّيف وتعلب خطير أستاذ كبير هدّاف
ماسك زمام الأمور فى الشدّة خفّه ودلع
وشوشت كلّ الودع باين علــيك عرّاف

كلّ اللىّ غاب عنـّنا له عندنا ســــــــلامات
يا(تريكه) انت و(زكى) مع (ميدو) او (بركات)
سلام (لشادى) و(شوقى) والغايبــــين منــّـكم
آدى حصاد زرعكم قــــوموا ارفعوا الرايات

آخـــــر يناير أحـــد نطق القمر باللــّــيل
يقرأ تاريخ البلد على شـــــط نهــر النيل
ع الميّه يروى الأمل م السّـاقية والحوّال
ساعة ماعادوا الرجال بالكاس يقول مواويل

حبّة الفول

حبّة الفول

أحسنتى فى القول يانبتة فول فى سجودك
وعرفتى فى الطين بتحنى لمين عنقودك
والأرض حنـّت وكنـّت فى الدفا لحضنك
ولف غصنك حصى شاهد على وجودك
,,,,,,,,,
فلقاكى ايد العنايه بالقدر نصّين
والروح مشت فى النـّوايه وعلـّمت صفـّين
بدات حياتك بحب الأرض والعشرة
وانفكـّت القشرة وظهر جوّه الغلاف فصّين
,,,,,,,,,,
رافعين ورقهم بنيّه للخشوع والفرض
مكتوب عليها الأجل والعمق ويّا العرض
والطـّرح ساعة معاده وامتى هاينوّر
وجدور تدوّر على النعمة فى بطن الأرض
,,,,,,,,,,,
بالحكمة سارى ف معدتك ويضخّ فى الشرايين
عارف طريق سكـّتك شادد غذاه م الطين
سارح وسابح فى حبّ الأرض ووجوده
فاتح لعوده مجال عايش مابين شطـّين
,,,,,,,,,
وفى النهايه يافول مأكول بنى الأنسان
لاحبست يوم خطوتك ولا مرّه كنت جبان
واللىّ عرف قصّتك حاير مابين أمره
ويقضـّى عمره ف خجل من نعمة الرحمن
,,,,,,,,,

رقم 1 عمي امين

تحت التّوته
(رقم1عمّى امين)

تحت التـوته يامستمعــــين
حكايات يامه فوق العشرين
ح اختارمنها اللـــّيله حكايه
حصلت مرّه لعمّى امــــين
,,,,,,,
عمّى امين دا راجل غلبان
بعافيه شويّه كـــده وبطلان
وحبّـة ارض بــيزرع فيها
وعنده جاموسه وحولى كمان
,,,,,,,
تحت التوته قاعد ويّانه
هوّ وابنه وبنــــته بهانه
فاجآه لقينا مراته بتصرخ
وجايّه علينا تقول آه يانه
,,,,,,,,
مالك؟ قالت فيه عربـــيّه
فيها مباحث وافـــــــنديّه
مطافى ونجده وخلق كتير
وناس م الحىّ وم الجمعيّه
,,,,,,,
ولودر ومعــــدّت بالكــوم
قالو لى صحّى امين م النوم
خوفت لا ياخدوا عيالك منىّ
قــوم يا امين كلّمــهم قـــوم
,,,,,,,
قبل ما يوصل واللاّ يجوله
لقينا امين واقع من طوله
سيــبنا مراته تفــــــــوّق فيه
وقرص الضغط ابنه يجبهوله
,,,,,,,,
اصحى ياعم امين وتعاله
انت بنيت فى الغيط طوّاله
لمّا بنيتها بدون ترخيص
حدّ شكاك عـملولها ازاله
,,,,,,,,
سمعوا لابنه يقول بقــّين
وبنته تزعّق زعّوقتـــين
وعملوا ازاله للطــــوّاله
واخدوا معاهم عمى امين
,,,,,,,,
بعد ما كان ليّسها بطـــين
عرضها متر وطولها اتنين
البرســـيم بيجــيبه علـــيها
وفيها بيربط له بهمتـــــين
,,,,,,,
شهرين عمى امين بيلــيص
حبّه نيابه وحـــبّه بولـــــيس
رهن الارض وباع الـــــدّار
ومضى اقرار يعمل ترخيص
,,,,,,,
عقد الارض شــريها منـين
وتصوير جوّى سنة تمانين
يعنى مقايسه ورسم كروكى
وخبـير يحسب تمن الطّين
,,,,,,,,,
وشهاده كبيره من الجمعــيّه
تقول الارض ماهش زراعيّه
ومحضر فيك عــند المآ مور
لو ع الصّور تزرع ملوخيّه
,,,,,,,,,
وتجـيب ابنك واللاّ مــراتك
بشـــوال واسع ل ملــــــفّاتك
ويمضى يكون مسئول قدّامنا
انّه يكـــــــــــمّل بعـد وفاتك
,,,,,,,,,
يوماتى السّاعه تمانيه تجـيـنه
وتدفع رسم معايـــنه عليــــنه
غير حلاوتها وغير بكشـيشها
فى قصّ شريطها لازم تدعينه
,,,,,,,,,
باين عـقل صاحبنا اتهفّ
ماشى ودايما ف ايده ملفّ
يوم مدريّه ويوم جمعـــيّه
حتّى الجمـعه ما بطّل لف
,,,,,,,,
سيرته ف وسط الناس انزاعت
حتّى بطاقته ف مشوار ضاعت
جاب الرّخــصه وبيفــــــرّحنى
ناسى بان بهايــــمه انباعت
,,,,,,,
ويعوّض الله فى الاتنين (الجاموسه وعمى امين)
والى لقاء فى حكايات تحت التوته

حكايات تحت التوته

حكايات تحت التوته

انا تحت التوّته عامل ضلّيله
سقف نباتى وارض نجـــيله
لمّت كلّ حبايب العــــــــيله
فى صحبه جميله تحت التوته
,,,,,,,,,
وعلى الدّاير مصطبتـــين
كـنّا عملــــناهم بالطّــــين
عليها مخدّه وجوز بطاطين
للىّ يكوّع تحت الـــــتوته
,,,,,,,,
على ناصيتها ربطنا غدانا
وعقدة حطب القطن معانا
لمّا الشاى والسـّـــكّر جانا
عدلنا هوانا تحت التـــوته
,,,,,,,,
واهو جار منها زرعنا خضار
فلفل شطّه وفول وخـــــيار
تعوز العيش الحاف م الدار
وكلّ غاموسنا تحت التوته
,,,,,,,,,
تحت التوته الجوّ جميل
حتّى ولو نسهر باللـــيل
لمّا الدنيا علــــينا تمـــيل
نجرى ونقعد تحت التوته
,,,,,,,,,
ساعة الراكيه ماتولع فيها
يضــــيع البرد وبتدفــّـيها
وطعم درانا المشوى مليها
وكيــفك تقـعد تحت التوته
,,,,,,,,,
تحت التوته بتقــــــعد نوبه
فى عزّ الصيف تلاقيها رطوبه
مجلس عـرفى واللاّ خطوبه
كلّه بيحــــــصل تحت التوته
,,,,,,,,
تحت التوته بالم عـــيالى
واقابل عمّى واضيّف خالى
وانسى همومى واريّح بالى
ساعة ماقـــعد تحت التوته
,,,,,,,,,
اصلها طالّه على الزراعيّه
وكلّ الناس بتــــــمرّ علـــيّه
وزرعى ف ارضى بيضحك ليّه
وانا باتفـــرّج تحــــت التوته
,,,,,,,,
تحت الـــتوته بنـــتعلـّم
من بعــض لمّا بنــتكلـّم
نسمة صيف ياسلام سلّم
تردّ الروح تحت التوته
,,,,,,,,
وكلّ ما حدّ يعدّى عليّه
لازم يقعد فيها شــــويّه
ياخد نفسه ويشرب ميّه
ويفرح بيّه تحت التوته
,,,,,,,,,
ونبعت ساعه البت بهيجه
لعمى محمد ابو خديـــجه
علشان ييجى ونلعب سيجه
ولو يغلــــبنا تحت الــتوته
,,,,,,,,
كلّ يومين ح احكيلكو حكايه
حصلت ويّا الناس ومعايه
واللـّى يشكّ ف كلمه ورايه
اقول له اتفضّـل تحت التوته
,,,,,,,,
بينها وبين الدّار ميت خطوه
فى دماغ ارض الاستاذ عطوه
املى اشوفكم يوم على سهوه
ونشرب قـــــهوه تحت التوته
,,,,,,,,,
تحت التوته تلا قوا معايه
ميت حدّوته والف حكايه
وكلّ واحد عـــنده روايه
لمّا بنـــــقعد تحت التوته
,,,,,,,,,
وانا باوعـدكم بعد يومين
تقروا حكاية عمّى امين
واحد م النـّاس القاعـدين
دايما عـندى تحت التوته
,,,,,,,,